نصائح هامة للعروسة قبل فرش بيت الزوجية

السلام عليكم ورحمة الله وبركاته
انا هبتدى معاكوا واحدة واحدة فى فرش منزلك الجديد اللى هتعيشى فيه مع حبيبك وجوزك
واللى هتكونى فيه اسرتك وتمليه اطفال ان شاء الله...
اول حاجة هنتكلم عنها الارضيات والاسقف
طبعا معروف فى علم الديكورات انه لو كانت شقتك ضيقة فمن المستحب ان تكون الارضيات والاسقف الوانها فاتحة
يعنى مثلا لو انتى هتركبى فى الارضيات سيراميك فيستحسن يكون من درجات البيجات الفاتحة او الابيض وفى اشكال تشبه الرخام قمة فى الروعة
اما الاسقف فمعروف اللون الابيض انه حلو اوى فيها
وكمان ممكن يتعمل لون تانى بس يكون فاتح اوى زى البينك او السماوى ودة ممكن يتعمل فى غرف الاطفال والليفنج رووم
بالنسبة للريسيبشن وغرف النوم ممكن يتعملوا لون ارضية واحد
اما الحمامات والمطبخ يفضل ان يكون لكل منهم لون مختلف عن باقى الشقة
الالوان المقترحة للحمامات والمطبخ(البينك والسماوى والبيستاج والبنيات بدرجاتها والحمر)
تانى حاجة نتكلم عنها الوان الحوائط
بوصى ياستى الوان الحوائط بتعتمد على شخصيتك فى الدرجة الاولى
يعنى لو انتى شخصية هادية وبتفضلى الهدوء والراحة والبساطة انصحك بالابيض والبيج او البيستاج او السماور فى درجات الحوائط
اما لو كنتى بئة شخصية جريئة وبتحبى تمشى على الموضة فانصحك بالاحمر والموف الفاتح والغامق والكحلى والاورانج وورق الحوائط الملون والكرتون منه حلو اوى فى غرف الاطفال....
اما الموضة دلوقتى هى انك تعملى حيطة لون او مقلم عريض او رفيع او ورق حائط وبقية حوائط الغرفة لون تانى خالص بس يكون طبعا لايق مع لون الحيطة المختلفة
/0تالت حاجة هنتكلم عنها الفرش او العفش
لازم طبعا تحددى انتى عايزة الفرش بتاعك الوانه اييية واذا كان مودرن ولا كلاسيك؟
وطبعا ماوصيكيش فى الليفنج رووم او غرفة المعيشة يستحسن ان يكون الفرش بسيط اوى ومايكونش فيه بهرجة لان الغرفة دى هتعيشى فيها اكتر من نص عمرك
ولازم يكون فيها ترابيزة صغيرة عشان تحوطى عليها التليفون والريموت والحاجات دى
يستحسن يكون فى الريسيبشن كونسول ومرايا لوضع المفاتيح عليه والمراية عشان تظبطى نفسك قبل ماتنزلى
طبعا فى كل غرفة لازم ساعة حائط حتى المطبخ
رابع حاجة الستاير
طبعا لو فرشك مودرن هتعملى الستاير مودرن بدرابيات بسيطة اوى
اما لو كان كلاسيك هتعملى درابيات كبيرة ولازم الستاير الوانها تمشى مع الوان الحوائط والفرش
نفسك فى اية تانى ابعتيلى وانا اقولك